ਤਾਜਾ ਖਬਰਾਂ
ਦੇਸ਼ ਭਰ ਵਿੱਚ 20 ਫ਼ੀਸਦੀ ਈਥਾਨੌਲ ਮਿਸ਼ਰਿਤ 'E20' ਪੈਟਰੋਲ ਦੀ ਵਰਤੋਂ ਵਧਣ ਦੇ ਨਾਲ ਹੀ ਵਾਹਨ ਮਾਲਕਾਂ ਵਿੱਚ ਇੰਜਣ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾਵਾਂ ਦੇਖਣ ਨੂੰ ਮਿਲ ਰਹੀਆਂ ਹਨ। ਸੰਸਦ ਵਿੱਚ ਇਸ ਮੁੱਦੇ 'ਤੇ ਸਥਿਤੀ ਸਪੱਸ਼ਟ ਕਰਦਿਆਂ ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਆਖਿਆ ਹੈ ਕਿ E20 ਬਾਲਣ ਨਾਲ ਜ਼ਿਆਦਾਤਰ ਵਾਹਨਾਂ ਦੇ ਇੰਜਣ 'ਤੇ ਕੋਈ ਮਾੜਾ ਅਸਰ ਨਹੀਂ ਪਵੇਗਾ। ਹਾਲਾਂਕਿ, ਉਨ੍ਹਾਂ ਮੰਨਿਆ ਕਿ 2016 ਤੋਂ ਪਹਿਲਾਂ ਬਣੇ ਪੁਰਾਣੇ BS-III ਵਾਹਨਾਂ ਵਿੱਚ ਮਾਮੂਲੀ ਬਦਲਾਅ ਦੀ ਲੋੜ ਪੈ ਸਕਦੀ ਹੈ।
ਰਾਜ ਸਭਾ ਵਿੱਚ ਇੱਕ ਲਿਖਤੀ ਸਵਾਲ ਦੇ ਜਵਾਬ ਵਿੱਚ ਗਡਕਰੀ ਨੇ ਦੱਸਿਆ ਕਿ 1 ਅਪ੍ਰੈਲ 2005 ਤੋਂ ਲਾਗੂ BS-III ਮਾਪਦੰਡਾਂ ਵਾਲੇ ਅਤੇ 2016 ਤੋਂ ਪਹਿਲਾਂ ਨਿਰਮਾਣ ਕੀਤੇ ਗਏ ਵਾਹਨਾਂ ਵਿੱਚ E20 ਤੇਲ ਕਾਰਨ ਰਬੜ ਦੇ ਪੁਰਜ਼ੇ ਅਤੇ ਗੈਸਕੇਟ ਪ੍ਰਭਾਵਿਤ ਹੋ ਸਕਦੇ ਹਨ। ਹਾਲਾਂਕਿ, ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਆਮ ਰੱਖ-ਰਖਾਅ (ਸਰਵਿਸਿੰਗ) ਦੌਰਾਨ ਇਨ੍ਹਾਂ ਹਿੱਸਿਆਂ ਨੂੰ ਆਸਾਨੀ ਨਾਲ ਬਦਲਿਆ ਜਾ ਸਕਦਾ ਹੈ ਅਤੇ ਇਸ ਲਈ ਇੰਜਣ 'ਚ ਕੋਈ ਵੱਡੀ ਤਬਦੀਲੀ ਕਰਨ ਦੀ ਲੋੜ ਨਹੀਂ ਹੈ।
ਕੇਂਦਰੀ ਮੰਤਰੀ ਅਨੁਸਾਰ ਇੰਡੀਅਨ ਆਇਲ (IOCL), ਇੰਡੀਅਨ ਇੰਸਟੀਚਿਊਟ ਆਫ਼ ਪੈਟਰੋਲੀਅਮ (IIP), SIAM ਅਤੇ ARAI ਵੱਲੋਂ ਸਾਂਝੇ ਤੌਰ 'ਤੇ ਕੀਤੇ ਗਏ ਅਧਿਐਨ ਵਿੱਚ ਸਾਹਮਣੇ ਆਇਆ ਹੈ ਕਿ E20 ਦੀ ਵਰਤੋਂ ਨਾਲ ਵਾਹਨਾਂ ਦੀ ਕਾਰਗੁਜ਼ਾਰੀ, ਸਟਾਰਟਿੰਗ ਸਮਰੱਥਾ, ਡਰਾਈਵਿੰਗ ਅਨੁਭਵ ਜਾਂ ਧਾਤੂ ਤੇ ਪਲਾਸਟਿਕ ਦੇ ਪੁਰਜ਼ਿਆਂ 'ਤੇ ਕੋਈ ਨਕਾਰਾਤਮਕ ਪ੍ਰਭਾਵ ਨਹੀਂ ਪੈਂਦਾ। ਟੈਸਟਿੰਗ ਦੌਰਾਨ ਇੰਜਣ ਵਿੱਚ ਜ਼ਿਆਦਾ ਘਿਸਾਵਟ ਦਾ ਕੋਈ ਸੰਕੇਤ ਨਹੀਂ ਮਿਲਿਆ।
ਮਾਈਲੇਜ ਘਟਣ ਦੇ ਖ਼ਦਸ਼ਿਆਂ 'ਤੇ ਬੋਲਦਿਆਂ ਨਿਤਿਨ ਗਡਕਰੀ ਨੇ ਕਿਹਾ ਕਿ ਕਿਸੇ ਵੀ ਵਾਹਨ ਦੀ ਮਾਈਲੇਜ ਸਿਰਫ਼ ਤੇਲ 'ਤੇ ਨਿਰਭਰ ਨਹੀਂ ਕਰਦੀ। ਸੜਕਾਂ ਦੀ ਹਾਲਤ, ਡਰਾਈਵਿੰਗ ਦਾ ਤਰੀਕਾ, ਟ੍ਰੈਫਿਕ, ਵਾਹਨ ਦੀ ਸਰਵਿਸਿੰਗ ਅਤੇ ਇੰਜਣ ਦੀ ਸਥਿਤੀ ਵਰਗੇ ਕਈ ਹੋਰ ਕਾਰਕ ਵੀ ਇਸ ਲਈ ਜ਼ਿੰਮੇਵਾਰ ਹੁੰਦੇ ਹਨ। ਇਸ ਲਈ ਮਾਈਲੇਜ ਵਿੱਚ ਗਿਰਾਵਟ ਲਈ ਸਿਰਫ਼ E20 ਬਾਲਣ ਨੂੰ ਦੋਸ਼ੀ ਨਹੀਂ ਠਹਿਰਾਇਆ ਜਾ ਸਕਦਾ।
ਸਰਕਾਰ ਨੇ ਸਪੱਸ਼ਟ ਕੀਤਾ ਕਿ E20 ਪੈਟਰੋਲ ਨੂੰ ਬਾਜ਼ਾਰ 'ਚ ਉਤਾਰਨ ਤੋਂ ਪਹਿਲਾਂ ਲੰਬੇ ਸਮੇਂ ਤੱਕ ਲੈਬਾਰਟਰੀ ਟੈਸਟਿੰਗ, ਫੀਲਡ ਟਰਾਇਲ ਅਤੇ ਤਕਨੀਕੀ ਜਾਂਚ ਕੀਤੀ ਗਈ ਸੀ। ਦੁਨੀਆ ਦੇ ਕਈ ਹੋਰ ਦੇਸ਼ਾਂ 'ਚ ਵੀ ਈਥਾਨੌਲ ਮਿਸ਼ਰਿਤ ਬਾਲਣ ਸਫ਼ਲਤਾਪੂਰਵਕ ਚੱਲ ਰਿਹਾ ਹੈ। ਜੇਕਰ ਤੁਹਾਡਾ ਵਾਹਨ ਨਵਾਂ ਹੈ ਤਾਂ ਘਬਰਾਉਣ ਦੀ ਲੋੜ ਨਹੀਂ, ਜਦਕਿ 2016 ਤੋਂ ਪੁਰਾਣੇ ਵਾਹਨ ਮਾਲਕ ਆਪਣੀ ਅਗਲੀ ਸਰਵਿਸ ਦੌਰਾਨ ਰਬੜ ਗੈਸਕੇਟਾਂ ਦੀ ਜਾਂਚ ਜ਼ਰੂਰ ਕਰਵਾ ਲੈਣ।
Get all latest content delivered to your email a few times a month.
